ПИШИТЕ, ЯЗЫГЫЗ:
- содержание 
- тех.вопросы
© Copyright,
2000-2021
МТСС, ФРМ-FMP
Татароведение 
|
|
Литература / Произведения İldus Ğiläcev
Min Bäxetle Bäxetle min, saw-sälämät Ğömeremne oçlap kiläm. İrtägämä babalarım salğan Turı suqmağımnan atlap keräm. Bäxetle min, abelxäyät İman belän dönya kötäm. Balalarğa izge, tutıq qunmas, Ata-anam telen birep kitäm. Bäxetle min, xättä cirgä Tatar bulıp kilgän öçen. ...Keşe ikänemne isbat itep, Köräşergä kiräk bulğan öçen... Bolaqta Asfalt watıp cirne borawlilar - Ni bar anda? Nindi qatlamnar? Asqa töşep yullar tözü öçen Barsın belü kiräk atlamlap. Çama belän äytep birep bula Bu tirädä nilär yatqanın - Tatar söyägeder qatlı-qatlı, Bötennäre, turap atqanı. Balçığı da qızıl töstäräkter, Ul qädär qan ağıp betärme? Bu turlardan, metro zallarınnan, Tınıç qına niçek ütärmen?! Asfalt watıp, cirne tikşerälär, Qazan urtasında, Bolaqta. Taşqa tigän boraw tawışılday, Tarix ıñğıraşa qolaqta... Bolaqta metro tözelgänen hiç işetmädem. 93 yılda <особенно???> Yıli torğan taşlar Siña kildem, Böyek Bolğar ile, (Xacğa barğan sufi diyärseñ) Küz yäşemne tıyıp karap yördem Tetkälängän şähär tiräsen. Ütkän tarixıma üpkälämim, Täqdir wata, täqdir tergezä. Mäsxäräläp nigä yort qorğannar, Qaber taşı tezep nigezdä? Başı asqa kilgän qorılmalar, Qaplağan ay, sınıq duğası. Çirkäw basqıçında, poçmağında, Çärdäklängän islam doğası. Böyek xalıq monda başın salğan, Sağış qayta yıllar ütäli. Mäyet öslärenä öy torğızıp, Tınıç yoqlap bula mikänni?! Işanmağan idem bu xällärgä, Üz küzlärem belän kürgänçe. Berqatlı ber sabi bulğanmın iç Bolğar tufrağına kilgänçe. Tuzdırsañ da, taptap kümdersäñ dä, Xäqiqätne bulmi tomalap. İdel ağa, bezneñ ğadel şahit, Suı belän yarnı yuğalap. İzge taşlar şunda çığa tora, Poçmaqları betkän kitelep. Bez tüzäbez, alar yılap yata Bärgän sayın dulqın kiterep... Baralmam Qırımnarğa Qırımnarğa barıp yal italmam, Diñgezenä çumıp, qoyınıp. Tozlı suı ilsez ber xalıqnıñ Küz yäşläre bulıp toyılır. Yatıp bulmas qupşı tüşäklärdä, Şat awazlar tulğan öylärdä; Üz cirendä üksez bulıp, tışta Möhacirlär yılap yörgändä. Üz-üzemä doşman bulırmın kük, Tufrağına basqan säğättä. Özelergä citkän küz yäşenä Oxşap tora bit ul sürättä... Watan urtaq Nişlädeñ sin, böyek duslıq ile, Kem qaqşattı bezneñ berlekne? - Tınışalmi ärmän, azärbäycan, Üzbäk qua nigä törekne? Citmädeme inde ızğış-talaş, Az qan tügeldeme ütkändä? Şäfäq yağı nigä haman qızıl - Qoyaş yaqtılığı kötkändä? Tuğanlaştıq inde küptän diep, Yäşädekme ällä aldanıp? (Ber "alla"ğa kübräk tabındıq şul, Bütännärne iskä almadıq.) Qayberäwlär şuña öyrändelär Yuğarıdan torıp qararğa. Üz xalqınıñ telen, denen satıp, Küpme türä yöri yararğa. Ğädelsezlek, ärnü, kimsenülär Az buldımı ällä tatarda? Sabırlığıñ cıydı teşen qısıp, Ser birmäde läkin yatlarğa. Ğorur kileş yawda ülä belde Yaşen buldı doşman kergändä; Tübätäyen salıp säläm birde, Çäkçäk quydı duslar kilgändä. Bil bögärgä künegudän tügel - Watan urtaq, ğäziz, söyekle! Tuğrı duslıq bulmi taşlamasız, Şunı añlaw - üze böyeklek! Ömet ayı Başqalam dip kiläm siña, Qazan, Babalarım siña tabınğan. Räxätlänep mägär yöri almim, Xör tügel sin... yawlap alınğan. Yat isemnär señgän uramnarda Adaşmiça yörep bulamı? ...Ay yaqtısı ezlim... tübälärdä Qatlı-qatlı täre urmanı. İreklären cuyğan millätlärne Xalıq diep äytü yarasa - Tatarğa da keşe qağılmağan Berär poçmaq tieş läbasa. Canğa cılı bulsın anda barğaç, Ömet ayı torsın kügendä! Ä xäzergä andi paytäxetne Yörtäm barı küñel türendä... Qarlar eri Qazan uramında Celeklärgä ütep kerä salqın, Tırışsañ da qat-qat uranırğa. Çatnap torğan zähär salqında da Qarlar eri Qazan uramında. Toz sipkängä, keşe küpkä tügel, Säbäpläre anıñ tirändäräk. Ärwaxlarnıñ cılı tını çığa Yatsalar da asta, tirändäräk. Asıl irlär monda qanın tükkän, Doşman kilgäç ilne yögänlärgä. Qar tösenä kerep şul oyığan İstälekkä isän yörgännärgä. Qışqı salqında da ayaq peşä, Kilep çıqsañ Bolaq buylarına. Bezneñ sağış kebek, sızıp-sızıp Qarlar eri Qazan uramında... Küñeldäge tutıqmasa Manarasın sağınıpmı, Küktä köndez ay yözä... Aqyeget Yaqtı ayım, näq bezneñçä Zurayasıñ... yuğalasıñ... Ämma bezdän bäxetleräk - Ör-yañadan tualasın. Ğälilegeñ, pöxtälegeñ Nurlarıñda çağıladır. Üze şundi qävem genä Siña qarap tabınadır. Babalarım saylap alğan İzge cisem kügemdäge, Üz urının ezläp tabar - Tutıqmasa küñeldäge!.. Köläç manara Dini bulıp üsmäsäk tä, Bilne bögep allasına, Xäyran qalam mullalarnıñ İlne tota alğanına. Bügengedäy särxüşleklär, Zina qılış kürenmägän. Şöker itkän, keşe keşe Öleşenä ürenmägän. Awılına berüze bit, Partkomı yuq, sävitläre. Qanunnarğa ixtiramnıñ Qayda ikän säbäpläre? ...Yıllar buyı buş torsa da, Nik tözedek? Añlamassıñ,- Bik şat kömeş tübätäyle Şoma senaj manarası: Tabınu bağanası... Mañqort Xaywan diär ideñ - añı bar, Mäyet diär ideñ - canı bar, Yarlı diär ideñ - malı bar, Axmaq diär ideñ - sanı bar. ...Hämmase bar, läkin yüne yuq, Keşe dip äyterlek cire yuq. Kürkämlek çişmäse Bolğandıq bez... Çüp-çar belän Tutırdıq tuğan telne. Saf tatarça söyli torğan Tabasız xäzer kemne? Çista mäğnä ezli-ezli, Ütkängä qarim - türgä. Sizdem, nigä balıqlarnıñ Ürläwen haman ürgä. Ayu da uyanırmı? Yaz kilde... Bozlar ağa. Yoqlağanı Yar buyında yatıp qala. Ozaq tormi, Sızıp betä Şuşı qoyaş cılısında. Yaz kilde... Bar tereklek Añ yañartıp, Yäşärgändäy sizä üzen. Bügen, xätta, (Nindi ğäcäp!) Önendäge ayu-tatar Açtı kebek sıñar küzen...
|
Поиск по сайту:
Ссылка на mtss.ru обязательна
при использовании
материалов сайта !
|
|
|